Prifti katolik Regamy Thillainathan lufton kundër racizmit dhe për më shumë diversitet në Kishën Katolike në Gjermani.

Diçka që e përjetoj vazhdimisht vetë, është se kur shkoj për të vizituar besimtarët, pyetja e parë që më bëjnë gjithmonë ata që nuk më njohin është: Nga jeni ju? Dhe unë gjithmonë them: Unë jam nga Neussi. Pas kësaj ata që më pyesin heshin, sepse nuk e presin këtë përgjigje, tregon Regamy Thillainathan.

Vetëm pak klerikë në Gjermani janë njerëz me ngjyrë. Dhe me sa duket disa e kanë problem këtë gjë.

“Kur isha në Kongresin e Katolikëve në Lajpcig, po qëndroja tek stenda jonë si përfaqësues i kryepeshkopatës. Dhe më kujtohet se si erdhën dy gra. U afrova dhe i përshëndeta miqësisht. Kur papritur njëra nga gratë ma ktheu pa pikë kujdesi: ‘Po ty kush të paska lënë të hysh këtu?” – kujton prifti katolik.

Regamy Thillainathan kritikon faktin që Kisha Katolike në Gjermani është shumë euro-centrike dhe punëson kryesisht të bardhë. “Kjo fillon me atë që shumë prej teologëve gjermanë nuk merren fare me pikëpamjet e tjera të teologjisë në botë. Përkundrazi si serioze dhe elegante konsiderohet vetëm diçka që vjen nga zonat gjermano-folëse. Dhe vështirësia më e madhe fillon kur dikush mendon gjithmonë se është në gjendje ta interpretojë i vetëm botën.” – thotë Regamy.

38-vjeçari është përgjegjës për famullitarët e ardhshëm në dioqezën e tij. Ai i inkurajon ata të jenë të hapur ndaj perspektivave të reja në kishën dhe doktrinën katolike.

Thillainathan madje ka folur edhe me Papa Françeskun për vizionin e tij për një kishë më kozmopolite.

“Ai më inkurajoi që ta konsolidoj dhe ta zhvilloj më tej këtë ide, për të sjellë më shumë perspektiva dhe larmi në shkollimin e priftërinjve dhe për të mos mbetur vetëm në botën e vogël, evropiane, gjermane.” – thotë Regamy Thillainathan.

Në këtë mënyrë ndoshta një ditë dhe atë vetë dhe klerikët e tjerë nuk do t’i reduktojnë më tek ngjyra e tyre e lëkurës./dw/