Policia e Kosovës e ka arrestuar moderatorin dhe menaxherin e disa këngëtarëve, Meriton Mjekiqi, i cili dyshohet për gjuajtje me armë zjarri në Prishtinë.

Arrestimi ka ndodhur në shtëpinë e një familjari të tij në Fushë Kosovë ku dyshohet se ai po qëndronte në arrati.

Djali i hallës së tij i ka thënë Klan Kosovës se nuk e ka ditur se Meritoni po kërkohej nga policia, por se ai e kishte lutur që të qëndronte për disa ditë në shtëpinë e tij.

Rasti është konfirmuar edhe nga Policia e Kosovës.

Zëdhënësi i Policisë së Kosovës, Bajram Krasniqi e ka konfirmuar gjuajtjen me armë.
Sipas tij, ngjarja ka ndodhur në në ora 22:20 minuta të mbrëmjes së sontme. Deri te incidenti ka ardhur pas një mosmarrëveshjeje në komunikacion.

“Në ora 22:20, policia është njoftuar për një rast, në të cilin janë përfshirë dy vetura, konkretisht drejtuesit e tyre. Rasti, sipas informatave fillestare, ka ndodhur si pasojë e mosmarrëveshjeve në trafik të drejtuesve të dy makinave. Rasti është duke u trajtuar në SP ‘Jugu’ në Prishtinë”, tha Krasniqi.