Lëshimi i dokumenteve të reja të udhëtimit për qytetarët e vendit me emrin e ri kushtetues do të fillojë më 1 korrik, sipas Projektligjit për ndryshimin e ligjit për pasaportat e shtetasve të Republikës së Maqedonisë së Veriut, i cili kaloi sot në leximin e parë të seancës së Komisionit Parlamentar për Sistem Politik dhe Marrëdhënieve në mes Bashkësive.

Projektligji kaloi pa diskutim në seancë dhe u dha për procedim të mëtejshme.

Siç shpjegohet nga Komisioneri nga Ministria e Brendshme Vesna Dorevska, ndryshimet në Ligj harmonizohen me dispozitat e Ligjit për Përdorimin e Gjuhëve, si dhe me Ligjin Kushtetues për Zbatimin e Ndryshimeve XXXIII në XXXVI të Kushtetutës së Republika e Maqedonisë.

Gjegjësisht, me miratimin e Ligjit për Përdorimin e Gjuhëve, përveç detyrimeve të tjera që burojnë prej tij, u imponua nevoja për harmonizimin e formularëve për dokumentet personale të qytetarëve të lëshuar nga Ministria e Brendshme. Për dokumentet e udhëtimit si dokument personal i qytetarëve, harmonizimi kryhet në pjesën e mënyrës së shtypjes së formularëve për dokumentet e udhëtimit dhe mënyrën e shkrimit të të dhënave në to, në mënyrë që të harmonizohet në tërësi zgjidhja ekzistuese ligjore me zgjidhje ligjore e parashikuar në Ligjin për Përdorimin e Gjuhëve, si në pjesën e zbatimit ligjor të gjuhëve të të gjitha bashkësive etnike në vend, ashtu edhe në përcaktimin terminologjik të kategorive të ndryshme të qytetarëve nga bashkësitë etnike, në mënyrën e përcaktuar në Ligjin për Përdorimin e Gjuhëve.

Parashikohet edhe harmonizimi i Ligjit me Amendamentin XXXIII të Kushtetutës së Republikës së Maqedonisë së Veriut, për sa i përket afatit të fundit për zëvendësimin e pasaportave ekzistuese që përmbajnë mbishkrimin “Republika e Maqedonisë” me pasaporta me emrin e ri kushtetues të vendit, duke respektuar afatin e parashikuar në nenin 3 të Ligjit Kushtetues për zbatimin e ndryshimeve nga XXXIII në XXXVI të Kushtetutës, domethënë pesë vjet nga hyrja në fuqi e ndryshimeve kushtetuese, përcjell telegrafi maqedoni.

“Formularët e dokumenteve të udhëtimit të qytetarëve që flasin gjuhë zyrtare të ndryshme nga gjuha maqedonase e folur nga të paktën 20 përqind e qytetarëve të Republikës së Maqedonisë së Veriut shtypen sipas detyrës zyrtare dhe të dhënat shkruhen në gjuhën dhe alfabetin e përdorur nga qytetari. Formularët e pasaportave të qytetarëve që flasin gjuhë tjetër nga maqedonishtja, të folur nga më pak se 20 përqind e qytetarëve të Republikës së Maqedonisë së Veriut, me kërkesë të tyre, shtypen në gjuhën dhe alfabetin e përdorur nga qytetari. Me kërkesën e tyre personale, të dhënat e futura në pasaportë shkruhen në gjuhën dhe shkrimin e përdorur nga qytetari. Po ashtu, me kërkesë të tyre personale, të dhënat për emrin personal që futen në pasaportë shkruhen në gjuhën dhe alfabetin e përdorur nga qytetari”, thuhet në Projektligj.

Projektligji përmban dispozitë kalimtare e cila përcakton që dokumentet e udhëtimit që përmbajnë mbishkrimin “Republika e Maqedonisë” të lëshuara deri në datën e zbatimit të këtij ligji, do të jenë të vlefshme deri në periudhën e vlefshmërisë të specifikuar në pasaportë, por jo më gjatë se 12 shkurt, 2024. Ndryshimi i propozuar ka për qëllim harmonizimin e ligjit me afatin e paraparë në nenin 3 të Ligjit Kushtetues për zbatimin e ndryshimeve nga XXXIII në XXXVI të Kushtetutës së Republikës së Maqedonisë, përkatësisht pesë vjet nga hyrja në fuqi e ndryshimeve kushtetuese. Ligji, sipas propozimit, duhet të hyjë në fuqi në ditën e tetë nga dita e botimit në “Gazetën Zyrtare të Republikës së Maqedonisë së Veriut” dhe do të zbatohet nga 1 korrik 2021.