Kancelarja gjermane theksoi në konferencën e shtypit se infektimet po ulen, por virusi mbetet i rrezikshëm. Ajo u shpreh optimiste për marrëdhëniet me SHBA.

Kancelarja gjermane Angela Merkel tha se ka arsye për optimizëm në këtë “fazë të vështirë të pandemisë”, por Gjermania duhet të punojë së bashku me BE për të parandaluar përhapjen e varianteve të reja të koronavirusit.

Kancelarja gjermane Angela Merkel tha në një konferencë shtypi të enjten se “ne jemi në një fazë të vështirë të pandemisë”. Gjermania i zgjati masat aktuale kufizuese të paktën deri për në 14 shkurt të martën, duke reflektuar shkallën e lartë ditore të infektimeve dhe numrin e vdekjeve.

Virusi mbetet i rrezikshëm

“Nga njëra anë, numri i infektimeve ditore gradualisht po ulet,” tha Merkel. “Dhe numri i njerëzve në kujdes intensiv po zvogëlohet. Të gjitha këto janë lajme të mira.”

Ajo gjithashtu theksoi se rregulloret e koronavirusit do të ishin pozitive për çdo pjesë të shoqërisë në plan afatgjatë – për arsimin, kulturën dhe ekonominë.

“Por virusi është akoma shumë i rrezikshëm. Ne kemi një numër vdekjesh tronditës të lartë, më shumë se 1000 njerëz sot,” tha ajo.

Ajo foli për rrezikun e mutacioneve të virusit dhe tha se renditja e gjenomit të varianteve të reja do të ishte tema kryesore e diskutimit në videokonferencën e Bashkimit Evropian të enjten në mbrëmje.

“Epidemiologjikisht BE është një rajon,” tha ajo, dhe kërkoi masa ekuivalente për të luftuar virusin në të gjithë bllokun.

Merkeli tha se mundësia e imunitetit të tufës në Gjermani me programin e vaksinave nuk ishte duart e saj – përkundrazi, kjo varej nga sa qytetarë duan të vaksinohen. Organizata Botërore e Shëndetësisë ka vlerësuar se 70% e popullsisë duhet të vaksinohen për të arritur imunitetin e tufës; rreth 1.5% e popullsisë gjermane është vaksinuar deri tani.

Ajo tha se Gjermania do të ketë “më shumë se mjaftueshëm doza vaksinash” gjatë këtij viti dhe shprehu shpresën se prodhimi mund të rritet.

Kancelarja shpresoi gjithashtu për vaksina për të rinjtë. Më shumë të rinj janë prekur nga kjo valë e pandemisë sesa në pranverën e vitit 2020.

“Kjo pandemi është katastrofa e shekullit. Durimi po vihet në provë,” tha Merkeli.

‘Në tremujorin e tretë Gjermania do të jetë në gjendje të shpërndajë doza’

Ajo gjithashtu u ndal te shqetësimet në lidhje me pabarazinë ndërkombëtare të shpërndarjes së vaksinave në të gjithë botën. Ajo tha se bashkëpunimi ndërkombëtar do të ketë rëndësi thelbësore në përfundimin e pandemisë.

Në lidhje me vendet më të varfëra, Merkelin tha se Gjermania do të ketë mjaft vaksina në tremujorin e tretë, kështu që do të jetë në gjendje të shpërndajë doza. Kancelarja tha se gjithmonë mund të ndodhë që të jenë të nevojshme punime në fabrika për të rritur kapacitetet e prodhimit. Sidoqoftë, ajo beson se Gjermania do të marrë edhe dozat e premtuara nga BioNTech dhe Pfizer.

Merkel: bashkëpunim më i gjerë me SHBA

Në konferencën e shtypit, kancelarja Merkel u shpreh edhe për ndryshimin e pushtetit në SHBA dhe marrëdhëniet që rezultojnë. “Marrja e detyrës nga Joe Biden është një sinjal i mirë. “Bashkëpunimi thjesht bazohet përsëri në një themel më të gjerë të bindjeve të përbashkëta.”

Por Merkeli paralajmëroi kundër besimit se Evropa mund të rrijë e qetë pas ndryshimit të pushtetit në SHBA.”Evropa do të duhet të marrë më shumë përgjegjësi në përgjithësi”. Kjo vlen në aspektin ekonomik, diplomatik, por edhe ushtarak.

aud (dw, tgsch, dpa)