Agjencioni Kundër Korrupsion vendos për Blerim Kuçin në rastin e tenderit të fituar nga kompania e tij

11:09 | 8 Janar 2021
Arbresh.info

Agjencia Kundër Korrupsion ka vendosur për rastin e ministrit të Ekonomisë dhe Ambientit, Blerim Kuçi, nëse ka pasur konflikt interesi për tenderin e fituar nga kompania, ku ai është pronar.

Në vendimin e AKK-së, të lëshuar më 24 dhjetor 2020, është vendosur që rasti është mbyllur për shkak se nuk ka prova që argumentojnë dyshimin e arsyeshëm për ekzistimin e situatës së mundshme të konfliktit të interesit në ushtrimin e funksionit publik, shkruan arbresh.info.

Në vendim thuhet se “AKK ka shqyrtuar dhe analizuar të gjitha dokumentet dhe informacionet në dispozicion dhe duke pasur parasysh dispozitat e Ligjit për Parandalimin e Konflitit të Interesit, ka konstatur se në këtë rast biznesi privat NPN “Hidroterm” sh.p.k, nuk ka fituar kontratë brenda institucionet ku zyrtari i lartë ushtron funksionin publik, e që në kuptim të nenit 13, paragrafi 3, të Ligjit për Parandalimin e Konflitit të Interesit, një kufizim të tillë vlen vetëm brenda institucionit të nivelit qendror dhe lokal, ku zyrtari i lartë ushtron detyra publike.

Gjithashtu dokumentet dhe kontrata në fjalë janë nënshkruar nga personi i besuar (personi i autorizuar) i biznesit në fjalë. Prandaj në rastin konkret, Agjencia Kundër Korrupsion konstaton se nuk ka prova me të cilat vërtetohet ekzistimi i situatës së konfliktit të interesit në ushtrimin e funksionit publik për zyrtarin e lartë, subjekt i trajtimit për konfliktin e mundshëm të interesit”.

Ministri Kuçi është akuzuar se ka konflikt interesi në marrjen e tenderit nga kompania e tij, ku ai nuk ka funksion ekzekutiv, për ndërtimin e spitalit “Nëna dhe Fëmija” në Prizren. Edhe pse procedurat për këtë tender kanë përfunduar gjatë kohës kur Blerim Kuçi ka ushtruar funksionin e ministrit, të gjitha procedurat paraprake janë kryer kur ai nuk ka pasur funksion as të ministrit dhe as te deputetit./Arbresh.info

Shpërndaje në rrjete sociale

Të ngjashme