Ligji për Rimëkëmbje Ekonomike mund të quhet ligj i turpit, pasi në kohë pandemie krerët e shtetit bënë shumë pak për ekonominë në vend.

Kështu vlerëson ish-kryetari i Odës Ekonomike të Kosovës, Safet Gërxhaliu, për arbresh.info

Sipas tij është e pamundur që një ligj i tillë dhe i realizuar me vonesë t’i zgjidhë gjithë këto probleme të grumbulluara.

“Është e pamundur që një ligj i tillë të i zgjidh të gjitha këto probleme të grumbulluara me kohë, që 10 muaj ligji në vete ka përjetuar amortizim moral dhe efektet e këtij ligji nuk janë ato që janë pritur. Përmes këtij ligji ka dështuar Kosova politikisht dhe lirisht mund të quhet si një ligj i turpit nga fakti që në këtë kohë të situatës pandemike në Kosovë më tepër ka dominuar agjenda politike sesa ajo ekonomike. Besoj se deri sa vendet e rajonit ju duhen dy apo tri vite për rimëkëmbje, Kosovës do t’i duhet dyfishi”, tha Gërxhaliu.

Në përpilim të këtij Ligji për Rimëkëmbje Ekonomike, Gërxhaliu thotë se vërehet një varrosje e dialogut, partneritetit dhe interesit qytetar.

“Ajo çka është interesante të thuhet pasi ta lexosh ligjin, shtrohet pyetja se si është e mundur që për një ligj prej 6 faqesh të mos ketë konsensus dhe gatishmëri për dialog dhe partneritet. Në përpilimin e ligjit është varrosur dialogu, partneriteti dhe interesi i qytetarëve.

Është e pamundur të pritet një kohë kaq e gjatë që të mos ketë unifikim të qëndrimeve dhe si duket vetë humbja e zgjedhjeve në Podujevë po lidhet drejtpërdrejt me një zhuritet në mes partnerëve të koalicionit dhe opozitës dhe erdhi deri te votimi”, tha Gërxhaliu

E sa i përket tërheqjes së 10 përqindëshit në Fondi i Kursimeve Pensionale të Kosovës, Gërxhaliu thotë se nuk është një zgjidhje e mirë.

Sipas tij më e rrugës do të ishte që të jepen 100 euro për secilin qytetar, sesa për 160 mijë të jepen nga 10 euro.

“Është e vërtetë që në Trustin Pensional ka më tepër se 460 mijë qytetarë kanë një pjesë të kursimeve, mirëpo vet fakti se afro 160 mijë e qytetarëve mund të marrin 10% , e dëshmon më së miri që kjo nuk është zgjidhje. Ne si ekspert kemi dhënë rekomandimet tona, mirëpo ato rekomandime kanë has ne vësh të shurdhër, sepse në parlamentin e Kosovës më shumë janë mbrojtur interesat e partive jo në dhënien e kontributit për miratimin e këtij ligji. Shumë më e rrugës ka qenë që për çdo qytetarë të jepen nga 100 euro, sesa për 160 mijë të jepen 10 euro. Besoj që do të vazhdoj avazi i vjetër, për Rimëkëmbje më tepër do të bisedohet sesa të bëhet”, tha Gërxhaliu.
Tutje ai shton se shteti duhet t’i ndihmojë edhe ata punëtorë të cilët janë larguar nga puna e që kanë qenë pa kontrata dhe që mos të bëhen selektime, po të ketë gjithëpërfshirje.

“Ligji në vete duhet të ketë një gjithëpërfshirje. Dua të besoj që vërtet ata punëtor që nga marsi nuk janë paguar, të gjendet një formë mbështetës. Është e vërtetë që me ligjin për pako emergjente është paguar një pjesë, mirëpo nuk janë vetëm ata të punësuar, sot kemi tkurrje të vendeve të punës, sot kemi mbyllje të bizneseve dhe e tëra kjo po i rrit tensionet sociale në Kosovë, prandaj është obligim institucional që të bëjmë më tepër, edhe ata që nuk janë të evidentuar të jenë pjesë e mbështetjes, sepse varfëria ekstreme është në rritje”, u shpreh ai.

Gërxhaliu mendon se ajo që i shtyu deputetët të mos e votojnë për një kohë të gjatë Ligjin për Rimëkëmbje Ekonomike është frika se mund të ketë vota më shumë për koalicionin qeverisës.

“Kur vendet e rajonit janë merr me rimëkëmbje ekonomike, në Kosovë janë merr më shumë që ta pengojnë këtë ligj. Frika që nëse kjo rimëkëmbje kalon do të ketë vota më shumë për koalicionin qeverisës, i ka shty deputetët që të jenë të pamëshirshëm ndaj qytetarëve dhe bizneseve. Ku vendet e rajonit kanë nda miliarda në Kosovë janë nda 208 milion euro, me këto nuk mund të bëhet asgjë”, tha Gërxhaliu.

Deputetët e Kuvendit të Kosovës me 72 vota për, asnjë kundër dhe asnjë abstenim, të premten e kaluar kanë votuar në lexim të dytë Ligjin për Rimëkëmbje Ekonomike./E.Haxhiu/arbresh.info/