Presidenti i Turqisë, Recep Tayyip Erdoğan, dënoi Islamofobinë në rritje në vendet perëndimore, duke thënë se fyerja e besimeve të njerëzve nuk ka asnjë lidhje me lirinë.

“Ju keni ndjekur nga afër poshtërsinë në Francë ndaj Profetit (Muhamed) nën etiketën e ‘lirisë së mendimit. Fyerja e figurave të shenjta të njerëzve është shumë larg lirisë, për shkak se mendimi është tjetër, fyerja është tjetër”, tha Erdoğan në një video-mesazh për kongresin e 23-të vjetor të Shoqërisë Muslimane Amerikane.

Duke theksuar se fanatizmi ideologjik ka fituar më shumë terren, Erdoğan tha se ata që inkurajojnë fyerjet ndaj Profetit dhe ata që injorojnë sulmet ndaj xhamive po përpiqen të fshehin fashizmin e tyre.

Duke nënvizuar se liria e mendimit dhe shtypit po përdoret gjersa sulmohen vlerat e shenjta, ai tha se këta persona nuk mund të tolerojnë as kritikën më të vogël ndaj vetes. Sipas Anadolu Agency, Erdoğan e quajti Islamofobinë si një sëmundje që përhapet më shpejt se koronavirusi.

“Racizmi kulturor, diskriminimi dhe intoleranca kanë arritur nivele që nuk mund të fshihen në vendet që për shumë vite janë vlerësuar si djep të demokracisë”, theksoi Erdoğan.

Ai po ashtu nënvizoi se Islamofobia dhe ksenofobia janë kthyer në një trend që drejton politikën shtetërore dhe e bën të vështirë jetën e përditshme, duke shtuar se margjinalizimi i muslimanëve për shkak të besimeve, gjuhës, emrave ose veshjes së tyre është bërë i zakonshëm në shumë vende.

Ai tha se Turqia, e cila përpiqet të parandalojë konfliktet mbi baza etnike dhe sektare, nuk heziton të përgjigjet nëse dikush shënjestron vlerat e tyre të shenjta.

“Ne po përpiqemi të ndjekim një politikë të ekuilibruar, të drejtë dhe të sigurt në vetvete që do të japë një shembull për gjithë njerëzimin, veçanërisht në lidhje me liritë fetare. Ne nuk ndërhyjmë në besimet ose mënyrën e jetesës së askujt dhe garantojmë lirinë e adhurimit për të gjithë qytetarët tanë që jetojnë në vend”, shtoi Erdoğan.

Për komunitetin turk që jeton në Amerikë, Erdoğan tha se ai po ndjek me kënaqësi marrëdhënien e ngushtë vëllazërore që ata kanë krijuar me grupe të tjera muslimane. Ai shtoi se takimi vjetor i Shoqërisë Muslimane Amerikane do t’i japë shpresë dhe forcë komunitetit islam.