Partia Demokratike në Prishtinë  (PDK) ka mbajtur konferencë për media, ku ka kërkuar të zbatohet vendimi i Kuvendit Komunal të Prishtinës për lirimin e qytetarëve nga pagesa e transportit publik për katër muajt e ardhshëm.

Asambleisti i PDK-së në komunën e Prishtinës, Leutrim Retkoceri tha se nga data 11 nëntor propozimi i PDK-së është vendim, pasi u votua nga shumica e asamblistëve dhe si i tillë duhet zbatohet nga kryetari i komunës së Prishtinës, siç e obligon neni 12 i Ligjit për Vetëqeverisje Lokale.

“Në këtë çast që po flasim, komuna ka të pashpenzuar 60 % të buxhetit të saj. Pra, ky është argument i mjaftueshëm që të largohen qytetarët nga pagesa në Trafikun Urban dhe koston e qytetarëve ta subvencionoj komuna e Prishtinës përmes buxhetit që nuk e ka shpenzuar.”, theksoi Retkoceri.

Nënkryetari i PDK-së në Prishtinë, Ilirik Musliu shprehu shqetësimin për nivelin e lartë të ndotjes së ajrit në kryeqytet, marrë parasysh edhe rrezikun që u kanoset qytetarëve nga virusi COVID 19.

“Në fillim të këtij muaji ne propozuam ofrimin e transportit publik falas nga muaji nëntor deri në muajin mars për qytetarët që udhëtojnë në Prishtinë, gjë që do të ndikojë në uljen e qarkullimit të veturave dhe përmirësimin e cilësisë së ajrit. Kjo masë do të vlejë për të gjitha linjat dhe për të gjithë qytetarët pa përjashtim duke i nxitur ata ta shfrytëzojnë transportin publik dhe jo veturat private”, tha ai.

Propozimi për lirimin e qytetarëve nga pagesa në Trafikun Urban i paraqitur nga asambleisti i PDK-së në Prishtinë, Leutrim Retkoceri në seancën e Kuvendit Komunal më 11 nëntor u aprovua nga asambleistët me 22 vota për, 7 kundër dhe një abstenim.

PDK në Prishtinë konsideron se zbatimi i këtij vendimi shkarkon trafikun brenda qytetit, mbron ambientin nga ndotja dhe kursen paratë e qytetarëve.