Kancelarja gjermane Angela Merkel ka paralajmëruar që muajt në vijim ka gjasa të sjellin përkeqësim të pandemisë me koronavirus dhe u bëri thirrje gjermanëve që të vazhdojnë ta marrin kërcënimin seriozisht.

“Ne duhet të presim që disa gjëra do të jenë edhe më të vështira në muajt në vijim sesa në verë”, tha ajo në konferencën tradicionale verore në Berlin, transmeton portali arbresh.info.

“Është serioze. Aq serioze sa ishte edhe më parë. Vazhdoni ta merrni seriozisht”, tha ajo, duke shtuar: “Ne duhet të vazhdojmë të jetojmë me këtë virus”.

Komentet e saj vijnë gjersa numri i infektimeve ditore në Gjermani vazhdon të rritet pas nisjes të ngritjes sërish në fillim të korrikut.

Merkel tha se qeveria e saj do të merrte masa për të mbrojtur grupet më të goditura në shoqërinë gjermane, veçanërisht fëmijët, të cilët kanë parë shkollimin e tyre të ndërprerë mes mbylljeve të shkollës para verës.

Qeveria do të bënte “gjithçka në mënyrë që fëmijët tanë të mos jenë humbës të pandemisë. Shkolla dhe kujdesi ditor duhet të jenë gjërat më të rëndësishme”, tha ajo.

Ajo tha se jeta nuk mund të kthehej në normalitet, derisa u gjet një vaksinë, duke shtuar se Gjermania po punonte në kontrata me disa kompani të ilaçeve për të siguruar një vaksinë të tillë./arbresh.info/