Vendet anëtare të BE-së do të vendosin nesër nëse do të hapin kufijtë e tyre për vizitorët nga vendet e Ballkanit për shkak të rritjes së pacientëve me coronavirus, përcjell Telegrafi Maqedoni.

Siç informon “Radio Evropa e Lirë”, sipas listës paraprake të vendeve për të cilat qytetarët e tyre do të lejohen të hyjnë në BE, vetëm Mali i Zi, Serbia dhe Bosnja dhe Hercegovina po bëjnë mirë, ndërsa Maqedonia e Veriut, Shqipëria dhe Kosova nuk janë përfshirë në listë për shkak të përkeqësimit të situatës me COVID-19.

Udhëzimet e Komisionit Evropian për hapjen e kufijve përcaktojnë se për një vendim të tillë, situata epidemiologjike duhet të jetë e krahasueshme ose më e mirë se mesatarja e BE-së. Prandaj, mesatarja duhet të jetë një maksimum prej 16 rasteve të reja të infeksionit për 100 mijë banorë në 14 ditët e fundit, informon korrespondentja e “Radio Evropa e Lirë” nga Brukseli.

Në takim u kërkuan informacione shtesë nga delegacionet e BE-së në vendet e rajonit për situatën në Ballkanin Perëndimor me rastet e reja me coronavirusi, të dhëna për numrin e pacientëve me kujdes intensiv, gatishmërinë e vendeve për t’u marrë me krizën në kontekstin e numrit të spitaleve, me qëllim që të marrin ndonjë vendim./Telegrafi/