Google ADS

LDK publikon rezultatet e votimit, 70 vota pro shkarkimit të Vjosa Osmanit

22:00 | 20 Qershor 2020
Arditë Shkodra

Lidhja Demokratike e Kosovës (LDK), ka publikuar rezultatet e votimit për shkarkimin e Vjosa Osmanit nga pozitat drejtuese në parti.

Në një komunikatë të lëshuar për media është bërë e ditur se nga 123 anëtarë të Këshillit të Përgjithshëm, 70 kanë votuar pro, 16 kanë votuar kundër, 9 kanë abstenuar dhe 28 nuk janë përgjigjur apo nuk kanë marrë pjesë në votim, shkruan lajmi.net.

“Në bazë të kësaj, si Kryetar i LDK-së konstatoj se Këshilli i Përgjithshëm i Lidhjes Demokratike të Kosovës VENDOSI që: Avdullah Hoti të zgjedhet nënkryetar i LDK-së; znj. Vjosa Osmani të lirohet nga pozita e nënkryetares së LDK-së dhe anëtares së Kryesisë”, bëhet e ditur në komunikatë.

Njoftimi i plotë:

Të nderuar anëtarë të Këshillit të Përgjithshëm të LDK-së
Ju falënderoj për shprehjen e qëndrimit tuaj në letrën që ua përcolla sot më dt. 20 qershor 2020.
Kam nderin tu njoftoj se deri në përfundim të afatit të shprehjes së qëndrimit tuaj, më 20 qershor 2020 në ora 19:00, pyetjeve: A e përkrahni propozimin që z. Avdullah Hoti të jetë nënkryetar i LDK-së, nga 123 anëtarë aktual të Këshillit të Përgjithshëm të LDK-së janë përgjigjur 99 anëtarë, prej tyre 92 janë shprehur për (Po); 3 janë shprehur kundër (Jo), 4 kanë abstenuar dhe 24 nuk janë përgjigjur, s’kanë marrë pjesë në votim.

Ndërsa për sa i përket propozimit për lirimin e znj. Vjosa Osmani nga pozita e nënkryetares dhe nga Kryesia e LDK-së, nga 123 anëtarë aktual të Këshillit të Përgjithshëm të LDK-së janë përgjigjur 95 anëtarë, prej tyre 70 janë shprehur për (Po); 16 janë shprehur kundër (Jo), 9 kanë abstenuar dhe 28 nuk janë përgjigjur, s’kanë marrë pjesë në votim.

Në bazë të kësaj, si Kryetar i LDK-së konstatoj se Këshilli i Përgjithshëm i Lidhjes Demokratike të Kosovës VENDOSI që:
z. Avdullah Hoti të zgjedhet nënkryetar i LDK-së;
znj. Vjosa Osmani të lirohet nga pozita e nënkryetares së LDK-së dhe anëtares së Kryesisë.

Me respekt,
Kryetari i LDK-së
Isa Mustafa

Shpërndaje në rrjete sociale

Të ngjashme