Corriere della Sera, në një analizë të saj jep arsyet se pse në disa prej vendeve më të varfra në Europë, ku përmendet edhe Shqipëria pandemia pati një impakt më të lehtë.

Shqipëria renditet e dyta ne kontinent për numrin me te ulet te viktimave për 1 milionë banore, si dhe e para për masat shtrënguese gjate pandemisë.

Pas tre muajsh emergjence si pasojë e pandemisë së Covid 19, të dhënat e grumbulluara lejojnë krijimin e një historiku, ose të paktën të pjesë së parë të tij.

Nga këto të dhëna del se në Evropë kanë fituar vendet që zakonisht konsiderohen më të dobët.

Shqipëria, Greqia, Rumania, Bullgaria, Hungaria dhe Sllovakia, kanë shënuar në raport me popullsinë, shumë pak dhe në disa raste një të dhjetën e viktimave në krahasim me vende të pasura të Europës si Franca, Gjermania, Zvicra, Suedia, Belgjika, Danimarka dhe Mbretëria e Bashkuar.

Kanë shënuar shumë më pak raste me Kovid 19, duke ia dalë të kontrollojnë kurbën e epidemisë dhe ta thyejnë më përpara, transmeton abcnews.al.

Fat? Ndoshta është dhe kjo. Ndoshta më pak persona mbartës të virusit janë transferuar në atë rajon qendër lindor të Evropës në javët vendimtare të janarit dhe shkurtit.

Por disa tregues të pranishëm në të dhënat bëjnë të mendosh se ka dhe dicka tjetër: këto vende u treguan më modestë, sepse ishin më të vetëdijshëm të brishtësisë së sistemeve të tyre shëndetësore. Për këtë arsye nuk i morën me lehtësi sinjalet që vinin nga Italia dhe Spanja dhe vendosën të aplikojnë më parë dhe më me ashpërsi, regjimin për mbylljen totale. E dinin se nuk mund t’i lejonin vetes të ndërmerrnin rreziqe

Një fotografi e situatës së 15 marsit të kaluar lejon të kuptohet se si rruga e dy pjesëve të Evropës – më e pasura në perëndim – më pak e pasura në Lindje – ndryshon dhe më shumë gjatë kësaj situate pandemie. Atë ditë Italia numëronte 1809 viktima nga koronavirus dhe 24 mijë raste infektimi. Spanja kishte 294 viktima dhe 7988 raste, por pjesa tjetër e Evropës mund të mendonte se ishte jashtë rrezikut. Franca, në atë kohë vendi i tretë më i prekur, kishte 127 viktima dhe 5423 të infektuar të regjistruar. Shumë, në pjesë tjetër të Evropës perëndimore dyshonin në mënyrë të heshtur se epidemia në jug të Evropës ishte rezultat i keq organizimit të vendeve të përfshira.

Universiteti i Oksford projektoi një njësi matëse nga 1 deri në 100 për sa i përket mbylljes graduale deri tek ajo totale e vendeve gjatë pandemisë. Në mes të muajit mars, grupi i vendeve modeste kishte nisur të lëviztepër të frenuar përhapjen e virusit:

Vendi ynë renditet i pari në këtë shkallë për sa i përket mbylljes

Shqipëria 84

Sllovakia 71

Rumania 67

Polonia 60

Hungaria 59

Greqia 57

Ndërsa vendet më të pasura dukeshin më të shkujdesur:

Gjermania 37

Franca 50

Belgjika 53

Britania e Madhe 11

Zvicra 46

Suedia 10

Një kufizim i lëvizjes dhe mbyllja e kufijve do të realizoheshin të gjithë Evropën perëndimore vetëm në muajin mars, dhjetë ditë më pas, kur tashmë ishte e qartë se epidemia nuk ishte vetëm një problem i Italisë apo i Spanjës. Ishin dhjetë dite fatale, që mund t’i kenë kushtuar jetën dhjetëra mijëra njerëzve.

Dy muaj e gjysmë më vonë janë të qarta shenjat se nënvlerësimi i vendeve më të forta të Evropës ka shkaktuar një kosto shumë të lartë. Dhe se modestia e vendeve të varfra të Evropës dha rezultatet e saj. I ka bërë më largpamës dhe më pak të brishtë. Sipas të dhënave të Uorld meter,

Shqipëria shënon 11 viktima për 1 milion banorë

Britania e Madhe 536 viktima për 1 milion banorë

Greqia 16 viktima për 1 milion banorë

Belgjika 795 viktima për 1 milion banorë

Sllovakia 5 viktima për 1 milion banorë

Franca 432 viktima për 1 milion banorë

Zvicra 220 viktima për 1 milion banorë

Rumania 60 viktima për 1 milion banorë

Gjermania 99 viktima për 1 milion banorë

Polonia 60 viktima për 1 milion banorë

Një pandemi dramatike sigurisht që nuk është konteksti i përshtatshëm për parabola të përgjithshme mbi vlerat e modestisë dhe të kujdesit por dhe të rreziqeve kur ka më shumë besim sec duhet tek ata që drejtojnë vendin. Por vetëdijesimi i brishtësisë përkatëse duket se i kanë bërë vendeve si Shqipëria dhe Greqia, një nder të madh.