Nxënësit e shkollës fillore “Ibrahim Rugova” në Obiliq nga tash do të kenë vend ku do t’i zhvillojnë aktivitetet e tyre të lira.

Kjo pasi që në këtë shkollë sot u përurua përfundimi i projektit infrastrukturor i cili përfshinë parkun dhe gjithë mobilierinë e parkut me karrige e ndriçim, drunj, shporta, kroje, fontanë dhe gjithashtu edhe parkingun.

Përurimin e përfundimit të këtij investimi, i cili ka kushtuar rreth 46 mijë euro, e bëri kryetari i Komunës së Obiliqit, Xhafer Gashi së bashku me drejtoreshën e shkollës, Shyhrete Gashi.

Më pas ata vazhduan brenda objektit të kësaj shkolle, duke vendosur lule pranë bustit të Ibrahim Rugovës që gjendej brenda dhe duke e nderuar me një minutë heshtje.

Me këtë rast kryetari Gashi, tha se investimi nëpër shkolla është prioritare për komunën që e udhëheq ai, në mënyrë që të krijohen kushte sa më të mira për edukimin e brezave të rinj.

“Gjatë fushatës e kam thënë dhe po e them prapë se një ndër prioritetet primare do të jetë arsimi për ne dhe në vazhdimësi do të jemi bashkë me juve në kontributin e përbashkët me qëllim që të krijojmë hapësira më të mira dhe të krijojmë mundësi më të mira prej juve që të kemi hapësira të mjaftueshme për të zhvilluar edhe aktivitetet e lira dhe ato mësimore… Është një falënderim shumë i veçantë për të gjithë mësimdhënësit, sinqerisht jeni duke e dhënë maksimumin drejt ngritjes së vetëdijes së nxënësve dhe ne e çmojmë shumë, prandaj nuk hezitojmë që në vazhdën e aktiviteteve që i kemi që të jemi në disponimin e juaj.”, tha Gashi.

E drejtoresha e kësaj shkolle, Gashi, e falënderoi komunën për këtë investim që siç e quajti ajo është shumë e rëndësishme për shkollën e tyre.

“Sot na bashkon një ngjarje e rëndësishme për shkollën tonë siç është përurimi i një projekti shumë të rëndësishëm infrastrukturorë për shkollën tonë. Që nga fillimi i mandatit na keni premtuar që do të bëni çmos t’i dilni zot fushës së arsimit, por njëkohësisht edhe të kërkoni përgjegjësi nga të gjithë ne për punën e përditshme që e bëjmë në arsim dhe në edukimin e brezave të rinj. Sot, një premtim i tillë u bë realitet siç janë bërë realitet edhe shumë e shumë projekte të tjera, prandaj shprehim mirënjohjen në emër të nxënësve, mësimdhënëse dhe gjithë stafit për kontributin që keni dhënë pa hezituar që të përkrahni arsimin si një fushë shumë e rëndësishme e jetës së një shteti”, tha Gashi.

Sipas të parit të Obiliqit, në këtë vit janë trajtuar edhe shkolla të tjera, si në fshatrat Kozaric? ? dhe Mazgit, me ç’rast janë krijuar kushte më të mira. Ndërsa, për vitin e ardhshëm planifikohet që shkolla e Gjimnazit edhe Teknika e kësaj komune të jenë përfitues të disa investimeve edhe më të mëdha.