Kryeministri britanik Boris Johnson do të implementojë Brexit-in deri më 31 janar dhe më pas do të negociojë një marrëveshje të re tregtare me Bashkimin Evropian deri në fund të vitit 2020, tha guvernatori Michael Gove të dielën.

Boris Johnson triumfoi në zgjedhjet e parakohshme parlamentare, të cilat ai i thirri për të trajtuar përfundimisht çështjen e Brexit-it të mbërthyer në një qorrsokak. Përvetësimi i shumë votuesve, e ndër ta edhe nga radhët e partisë kundërshtare, bëri që Johnson të thotë se do të drejtonte një “qeveri popullore”.
“Unë absolutisht mund të konfirmoj se ne do të kemi mundësinë të votojmë relativisht shpejt mbi projekt-marrëveshjen e tërheqjes dhe pastaj të sigurohemi që ajo të miratohet para 31 janarit”, tha Gove, transmeton Telegrafi.

Rishi Sunak , zëvendësministri i financave në Britani, tha se qeveria do të dërgojë një projekt marrëveshje tërheqjeje në parlament për ratifikim para Krishtlindjes, në mënyrë që ministrat të përqendroheshin në përparësitë e tjera të qeverisë, siç është rritja e shpenzimeve për shëndetin publik.

Sa i përket marrëveshjes së re tregtare, Gove u tha gazetarëve se të dy palët do të përfundojnë një pakt tregtar deri në fund të vitit 2020.

“Ne do të jemi në gjendje të lëmë BE-në para 31 janarit të vitit të ardhshëm, dhe pastaj do të përfundojmë bisedimet me Unionin për një kornizë të re për tregti të lirë dhe bashkëpunim miqësor, të cilin do ta kemi deri në fund të po këtij viti, – shtoi ministri.

Kryenegociatori evropian Michel Barnier dyshon se marrëveshja tregtare do të përfundohet shpejt. Bisedimet, tha ai muajin e kaluar, do të ishin “të vështira dhe kërkuese” dhe ai paralajmëroi britanikët se BE “nuk do të tolerojë një avantazh të padrejtë konkurrues”.