Ka nisur ekspozimi dhe promovimi i prodhimeve vendore në kuadër të “Javëve të Biznesit Kosovar 2019” me moto: Unë Konsumoj Produkte Vendore, Po JU? nga Aleanca Kosovare e Bizneseve në rrjetin e marketeve Viva Fresh Store në Prishtinë – Veternik,

Agim Shahini, kryetar i AKB-së, tha se për të shtatëmbëdhjetin vit organizohen “Javët e Biznesit Kosovar”, me moto: Unë Konsumoj produkte Vendore, Po Ju?.

Sivjet jemi më mirë sesa viteve paraprake, për shkak se është bërë një vit që kur është vënë taksa kundër prodhimeve serbe e boshnjake.

“Më 2003 kur nisëm “Javët e Biznesit Kosovar”, kishim rreth 35 produkte e tash pas 17 vjetësh tradite janë mbi 10 mijë produkte shqiptare e të cilat secilin vit shënojnë ngritje”, tha Shahini.

Kryetari i AKB-së shtoi se shkëmbimi i prodhimeve shqiptare duhet të lehtësohet në të gjitha tregjet shqiptare, e jo sikur po ndodh ku akoma ka barriera.

“Minishengeni ballkanik është i vonuar e i tejkaluar. Bizneset e vendit kanë nevojë për Shengen evropian e jo ballkanik e i cili izolon prodhuesit vendës”, tha Shahini.

Ai shtoi se institucionet duhet krijuar klimë më të mirë për bizneset e sidomos prodhuesit. AKB-ja do të jenë gjithmonë në krah të tyre.

“Duke konsumuar prodhimet vendore zhvillojmë shtetin, rrisim punësimin, prodhimin eksportet e punësimin. Prodhimi vendës është shtyllë e qëndrueshmërisë shtetërore “, tha kryetari i AKB-së.

Ndërsa Liridon Berisha, menaxher i marketingut në rrjetin e marketeve Viva Fresh Store tha se në raftet e tyre çdo ditë po shtohen produktet vendore e të cilat po i përkrahin fuqishëm duke i zëvendësuar ato të huajat.

Sipas tij mbi 30 për qind e shitjes në 66 pikat e rrjetit të marketeve të tyre janë prodhime vendore.

“Ne nga viti i ardhshëm do të kemi edhe me shumë prodhime vendore në raftet e marketeve”, tha Berisha.

Lexo edhe: ​Bien çmimet e importit në tremujorin e tretë 2019