Paulo Dybala është shprehur shumë i lumtur me golin vendimtar të shënuar ndaj Milanit.

Juventusi fitoi 1-0 ndaj Rossonerëve në kuadër të javës së 12-të, për ta rrëmbyer sërish kreun që po e rivalizon Interi me vetëm një pikë diferencë.

Sulmuesi argjentinas ka thënë se ata nuk bënë një paraqitje shumë të mirë, por e rëndësishme ishte që t’i marrin tri pikë.

“Mendoj se ishte e rëndësishme për të gjithë që të fitonim, pa shikuar kush do të shënonte. Nuk ishte paraqitja jonë më e mirë, por duhej të fitonim dhe të qëndronim në objektivat tona”, ka thënë La Joya.

“Milani nuk e ka startuar mirë sezonin, por ata janë Milani. Është një skuadër që ka shumë lojtarë kualitativ, por Szczesny bëri paraqitje të mirë”.

“Askush nuk e priste që unë të shënoja me këmbën time të djathtë. Aty kishte rënë topi dhe duhej të gjuaja me këmbën e djathtë, fatmirësisht shkoi mirë”, ka shtuar më tej Dybala.

Juvetusi aktualisht ka 32 pikë, një më shumë se Interi, derisa në javën e 13-të do të ketë punë me Atalantan. /Telegrafi/