Aktori nga Marvel, Jeremy Renner pretendohet të ketë kërcënuar të vriste veten dhe ish bashkëshorten e tij, sipas dokumenteve të padisë.

Ylli, i cili luan superheroin Hawkeye në filmat e Marvel është në një betejë ligjore për kujdestarinë e vajzës gjashtë vjeçare që e ka me Sonni Pacheco, transmeton portali arbresh.info.

Pacheco, një modele kanadeze që u martua me Renner në janar të 2014-ës para se të aplikonte për divorc në të njëjtin vit, ka akuzuar ish bashkëshortin për përdorim të drogës dhe abuzim emocional.

Një përfaqësues për Renner tha që pretendimet janë “të njëanshme”.

Në dokumentet ligjore të paraqitura në Los Angeles, Zonja Pacheco, e cila po kërkon kujdestarinë e plotë të vajzës së çiftit, pretendon se Renner dikur kërcënoi ta vriste.

Në një rast, ajo pretendon, Renner futi një armë në gojë para se ta gjuante në tavan.

Ai ishte nën ndikimin e kokainës dhe tha se “nuk mund të merrej më me të, dhe thjesht donte që ajo të shkonte”, thuhet në padi.

Zonja Pacheco gjithashtu pretendon se Renner mori kokainë ndërsa kujdesej për Ava dhe një herë la drogën në një vend ku mund ta mbërrinte vajza.

Një përfaqësues për Renner i tha revistës People: “Mirëqenia e vajzës së tij Ava ka qenë gjithmonë dhe vazhdon të jetë fokusi kryesor për Jeremy.

“Kjo është çështje që gjykata të vendosë. Është e rëndësishme të theksohet se dramatizimet e bëra në deklaratën e Sonni janë një deklaratë e njëanshme e bërë me një qëllim specifik në mendje”.

Kur bëri kërkesë për divorc në dhjetor 2014, Pacheco përmendi “dallime të pandreqshme” si arsyen e ndarjes./arbresh.info/