Komisioni për parandalimin e korrupsionit ka iniciuar më shumë lëndë ndaj zyrtarëve aktualë dhe nga qeverisja e kaluar, për shpërdorim detyre. Por, tani për tani, mbetet që institucionet përkatëse të bëjnë punën e tyre, për të proceduar këto lëndë në organet kompetente dhe që personat që kanë keqpërdorur detyrën të përballen me drejtësinë, thonë ekspertët në Maqedoninë e Veriut.

Si më problematike për zyrtarët e anti-korrupsionit, paraqitet mosveprimi në kohë dhe stërzgjatja e procedurave nga disa institucione edhe pse në bazë të ligjit, institucionet janë të obliguara t’u përgjigjen kërkesave të Komisionit Kundër Korrupsionit. Organizatat joqeveritare, që bëjnë pjesë në kuadër të projektit “Vëzhgimi i suksesit të punës së komisioneve shtetërore për parandalimin e korrupsionit”, po synojnë që të monitorojnë veprimet e institucioneve përkatëse që janë përgjegjëse për luftën kundër korrupsionit në Maqedoninë e Veriut.

“Qëllimi i monitorimit tonë ka të bëjë me llogaridhënien e institucioneve ndaj vendimeve që sjellë Komisioni Shtetëror për Parandalimin e Korrupsionit, përkatësisht synojmë krijimin e një sistemi për përforcimin e mekanizmave kontrollues ndaj veprimeve korruptive”, thekson Misha Popoviq nga Instituti i Demokracisë.

Për shkak të numrit të vogël të punëtorëve, Komisioni për parandalimin e korrupsionit, nuk po arrin që t’i hapë të gjitha rastet që denoncohen në këtë organ, e që, sipas të dhënave të fundit, deri në maj të këtij viti, në këtë institucion janë dorëzuar mbi 500 kallëzime për vepra korruptive.

Edhe në rekomandimet e fundit organizatës GRECO-s (Grupi i Shteteve kundër Korrupsionit), është apostrofuar nevoja për rritjen e financave dhe resurseve njerëzore, për Komisionin Shtetëror për Parandalimin e Korrupsionit.

Ndërkohë, pas një vendimi të marrë nga Qeveria maqedonase, gjatë këtij viti shkollor, të gjithë nxënësit pritet që të mësojnë edhe për luftën kundër korrupsionit.

Në anën tjetër, Naser Miftari, profesor në gjimnazin e përgjithshëm në Shkup, “Zef Lush Marku”, thotë për Radion Evropa e Lirë se grupmoshat më të reja, duhet të inkurajohen që të denoncojnë korrupsionin sepse sipas tij, kështu ata do të kontribuonin në zhvillimin e shtetit. Ai thotë se ligjëratat kundër korrupsionit nuk mjaftojnë dhe ato po bëhen “sa për sy e faqe”, vetëm për t’u përmbushur detyrimet që ka shteti nga Bashkimi Evropian.

“Në mënyrë edukative duhet intervenuar sa më shpejtë për të parandaluar këtë dukuri shumë të dëmshme për zhvillimin e shoqërisë. Kështu që edhe më herët, si punonjës i arsimit kam kërkuar që çfarëdo mase që të ndërmerret, për sa i përket luftës kundër korrupsionit, patjetër duhet filluar me segmentin edukativ”, thotë Miftari.

Ndërkaq, Dançe Danaillovska nga Fondacioni Soros, vlerëson se sektori civil ka një rol të rëndësishëm në krijimin e presionit publik ndaj institucioneve që merren me luftën kundër korrupsionit dhe krimit të organizuar, e të cilat nuk reagojnë me kohë.

“Lufta kundër korrupsionit për të duhet të jetë një përpjekje dhe angazhim i përditshëm i të gjitha institucioneve të shtetit. Por, gjithsesi, ky proces duhet të ndiqet me vëmendje nga sektori civil, i cili paraqet një hallkë shumë të rëndësishme me qëllim që të ketë rezultate në luftën kundër korrupsionit”, thotë Danaillovska.

Ndryshe, edhe faktori ndërkombëtar e ka theksuar si problematikë mosveprimin e institucioneve të Maqedonisë së Veriut dhe reagimin e ngathtë të tyre për sa i përket vendimeve të Komisionit për parandalimin e korrupsionit./REL/