Kryeministri i Maqedonisë së Veriut Zoran Zaev, në konferencë për shtyp është sqaruar në lidhje me bisedat telefonike të cilat u publikuan sot, në të cilat dy komikë rusë në mënyrë të rrejshme janë prezantuar si presidenti ukrainas Petro Poroshenko dhe sekretari i përgjithshëm i NATO-s, Jens Stoltenberg dhe kanë biseduar me Zaevin.

Ai tha se është viktimë e sinqeritetit të tij dhe hapjes që ka për të gjithë, duke shtuar qëllim i strukturave të tilla janë vendet që kanë aspirata euroatlantike.

Zaev tha se nuk është i vetmi i cili ka rënë pre e komikëve rusë, ndërsa përmendi se edhe presidenti francez Emmanuel Macron dhe ai turk kanë qenë “viktima” të dy komikëve rusë, të cilët paraqiten si personalitete të ndryshme, njofton Telegrafi Maqedoni.

“Jam i detyruar të njoftoj se jam bërë pjesë e të mashtruarve nga një strukturë e përgatitur mirë. Kjo është strukturë që përgatiten ndaj vendeve me aspirata euroatlantike. Nuk është e vështirë të vlerësohet si e tillë, pasi del nga mediume anti-NATO dhe anti-EU. Në të njëjtën mënyrë u mashtrua edhe presidenti francez Emmanuel Macron, gjithashtu edhe ministri britanik Boris Johnson, si dhe presidenti turk Recep Taip Erdogan. Kjo tregon se jam në shoqëri të mirë”.

“Në një pjesë të bisedës është intervenuar. Ajo është pjesa për çështjen me Kishën Ortodokse Maqedonase, ku ka pasur intervenim. Pjesa tjetër e bisedës vetëm konfirmon qëndrimet e mia, të cilat janë në interes të shtetit. Biseda tregon besimin tim se marrëveshja me Greqisë do të garantojë identitetin dhe gjuhën maqedonase. Kam folur edhe për përfitimet nga marrëveshja me Bullgarinë”.

“Ajo që mund të them është se jam viktimë i sinqeritetit tim dhe hapjes sime me gjithë partnerët tonë. Konfirmoj se do të ndryshohet gjithë protokolli për çështje të sigurisë dhe njoftoj se qeveria do të miratojë plan për mbrojtje nga lajmet e rrejshme”, tha mes tjerash Zaev.

Ndërsa i pyetur për publikimin e numrave të zyrtarëve të shteteve tjera, ai tha se nuk bëhet fjalë për sekret shtetëror, duke thënë se me publikimin e numrave të tyre nuk ka shkelur ligj.