KEDS ka njoftuar se të dielën në mesnatë ka ndodhur një incident me zjarr në lagjen 28-të të Fushë Kosovës.

Sipas tyre, si pasojë e djegies së bërllokut janë djegur edhe kabllot e tensionit të ulët dhe atij të mesëm.

“Si rrjedhojë kanë mbetur pa energji elektrike për afro një orë mijëra qytetarë. Përkundër kohës pas mesnate, ekipet e KEDS-it kanë dalë menjëherë në vendin e ngjarjes dhe kanë arritur ta sanojnë dëmin dhe konsumatorëve t’ua kthejnë energjinë elektrike rreth orës 1:50 (e hënë).

“Por, flakët kanë rrezikuar edhe nënstacionin E nga djegia eventuale e nënstacionit do të rrezikoheshin të mbetnin pa energji elektrike për kohë të gjatë komplet lagjja”.

“Kjo situatë është e papranueshme. KEDS apelon tek qytetarët që të mos ndezin zjarre në asnjë rrethanë, pasi pasojat në asetet energjetike, sidomos kur afektohen ato të tensionit të mesëm, mund të jenë katastrofike, godasin furnizimin njëherësh të mijëra qytetarëve dhe riparimi i tyre kërkon kohë të gjatë”.

“Në rast se i shihni zjarret afër aseteve energjetike KEDS apelon të keni kujdes dhe të lajmëroni menjëherë kompaninë dhe zjarrfikësit”.