Pas pohimeve të shumta në rrjetet sociale dhe në media të ndryshme se Arabia Saudite ka falur tre dijetarët islam për të cilët u tha se do të ekzekutohen pas Ramazanit, është konfirmuar se lajmi për faljen e tyre ka qenë i pavërtetë dhe dijetarët ende janë në pritje të ekzekutimit, transmeton Anadolu Agency ( AA).

Bëhet fjalë për dijetarët Salman al-Ouda, Awad al-Karni dhe Ali al-Omari, të cilët autoritetet saudite i akuzojnë se janë terroristë.

Grupi i aktivistëve sauditë “Të burgosurit e ndërgjegjes”, që mbron të drejtat e dijetarëve, publikoi në Twitter se pohimet në rrjetet sociale dhe në media të caktuara për faljen e tre dijetarëve islam, është i pa saktë.

“Këta udhëheqës fetarë nuk presin falje nga mbreti. Liria është e drejta e tyre themelore. Institucionet saudite duhet që këta njerëz t’i lirojnë menjëherë dhe pa kushte”, thuhet në një deklaratë të grupit.

Rijadi zyrtar nuk është prononcuar lidhur me pohimet për faljen.

Portali me seli në Britani të Madhe, “Middle East Eye”, shkruan se autoritetet e Arabisë Saudite po përgatiten të dënojnë me vdekje dhe të ekzekutojnë tre dijetarët në fjalë menjëherë pas Ramazanit dhe se bëhet fjalë për Salman al-Oudi, Awad al-Karni dhe moderatorin e njohur televiziv Ali al-Omar.