Ministri i Punëve të Jashtme të Kosovës, Behgjet Pacolli, ka informuar ministrat e Ballkanit dhe përfaqësuesit e Bashkimit Evropian në takimin e ministrave të Grupit të Vishegradit V4 dhe Ballkanit Perëndimor në Bratislavë për aksionin e madh policor në Kosovë.

Pacolli ka thënë se ky veprim është pa kurrfarë qëllimi për sulme ndaj komuniteteve të caktuara, duke shtuar se Serbia po i jep karakter etnik përpjekjeve për fuqizim të sundimit të ligjit.

Sipas njoftimit nga MPJ-ja, në fjalën e tij Pacolli ka dënuar veprimet shkatërruese të Serbisë që po ndërmerr kundër Republikës së Kosovës.

“Pjesëtarët e Forcave të Sigurisë të Kosovës, të cilët janë kërcënuar dhe janë vazhdimisht nën presion të largohen nga FSK-ja, pronat dhe familjet e pjesëtarëve të FSK-së po sulmohen, kërcënohen dhe për më tepër, pjesëtarët e FSK-së po arrestohen dhe lirohen nga policia serbe kur ata udhëtojnë në Serbi, vetëm për ta shtyrë largimin e pjesëtarëve serbë të FSK-së, duke i kërcënuar ata madje edhe me dënime publike të rënda. Rasti i fundit dy ditë më parë një kosovar u arrestua pa ndonjë arsye. Më shumë në lidhje me komunitetin serb që jeton në Kosovë është nën kërcënime të vazhdueshme dhe kërcënime nga institucionet serbe të sigurisë. Qytetarët serbë të Kosovës që punojnë për qeverinë e Kosovës konsiderohen tradhtarë nga Beogradi”, ka thënë Pacolli.

Pacolli ka bërë të ditur se “Serbia e pengoi bashkëpunimin rajonal duke orkestruar shfaqje të ndryshme që treguan fytyrën e vërtetë të Beogradit”.

“Duke e vënë theksin te rëndësia e një bashkëveprimi të përforcuar mes të gjitha vendeve të Ballkanit Perëndimor dhe vendeve anëtare të BE-së, Ministri evokoi rëndësinë e zhvillimeve të reja për fuqizimin e perspektivës evropiane të rajonit”, thuhet më tej në njoftim.

Sipas njoftimit, në takim u rikonfirmua mbështetja e plotë për rrugëtimin evropian të vendeve të Ballkanit Perëndimor. “Në këtë këndvështrim, ministrat përcollën njëzëri mesazhin se politika e zgjerimit është një investim strategjik në zhvillimin dhe sigurinë e Evropës si dhe ndikon në forcimin e marrëdhënieve të mira dhe bashkëpunimit në rajon”, thuhet në njoftim të MPJ-së ku shtohet se Pacolli ka vlerësuar se “procesi i zgjerimit duhet të jetë një proces i dyanshëm jo vetëm në aspektin gjeopolitik por edhe ekonomik”.

Pacolli ka shprehur shqetësimin pse Kosova është i vetmi vend që akoma s’ka marrë liberalizimin e vizave.

“Çfarë mesazhi i është dërguar popullit të Kosovës, vendit më pro europian në të gjithë Ballkanin Perëndimor dhe çfarë vlere evropiane i kemi dhënë rinisë sonë, por ata ende janë duke kërkuar të bashkohen me identitetin e tyre evropian”, ka thënë ai./arbresh.info/