Ministri i Punëve të Jashtme të Serbisë, Ivica Daçiq, ka reaguar pas deklaratave të presidentit të sapo zgjedhur të Maqedonisë Veriore, Stevo Pendarovski, se Maqedonia e ka njohur Kosovën si shtet për shkak të orientimit të strategjik dhe për shkak se një vendim i tillë ishte edhe kërkesë e komunitetit shqiptarë atje.

Sipas Daçiq, Maqedonia Veriore nuk e ka njohur Kosovën hatri i shqiptarëve, por vetëm që të afrohet me shtetet perëndimore, shkruan B92, transmeton Gazeta Express.

“Nuk ka asnjë argument që ata e kanë njohur Kosovën për shkak të shqiptarëve, pasi që si mund ta kishte njohur Mali i Zi Kosovën kur serbët janë komuniteti i dytë më i madh për nga numri, ku është parimi?”, është shprehur kreu i diplomacisë serbe.

Sipas tij të gjitha vendet e Ballkanit që e kanë njohur Kosovën, një vendim të tillë e kanë marrë vetëm që të afrohen me Perëndimin.

Daçiq thotë se vendimi i Maqedonisë për të njohur Kosovën nuk ishte një vendim i mirë, pasi që Serbia edhe përkundër raporteve të ndryshme me Greqinë, asnjëherë nuk e ka tërhequr njohjen.

“Doli se kemi gabuar, sepse tani Maqedonia quhet Maqedoni Veriore, po të kishim pasur të drejtë do të mbetej Republika e Maqedonisë”, ka thënë Daçiq.

E presidenti i porsa zgjedhur i Maqedonisë së Veriut, Stevo Pendarovski, ka thënë se qëndrimi i shtetit të tij karshi Kosovës, nuk ka ndonjë ndikim negativ në raportet ndërmjet Maqedonisë së Veriut dhe Serbisë, ndërkohë ka paralajmëruar një takim të shpejtë me presidentin e Serbisë, Aleksander Vuçiq.

“Ne e kemi njohur pavarësinë e Kosovës, dhe ne e kemi bërë këtë në përputhje me orientimin strategjik, duke pasur parasysh qëndrimin e komunitetit shqiptarë, që është i dyti për nga madhësia në vendin tonë”, ka thënë Pendarovski në një intervistë për të përditshmen beogradase ‘Politika’./GazetaExpress/