Ndërprerja e furnizimit me energji elektrike, ka lënë pjesën më të madhe të Venezuelës në errësirë, të cilën operatori shtetëror i energjisë elektrike CORPOELEC, e quajti “luftë energjetike kundër kombit”, transmeton Aandolu Agency (AA).

Të përditshmet në atë vend, shkruajnë se ndërprerja e energjisë elektrike preku përafërsisht 22 nga 23 shtetet brenda Venezuelës, duke lënë në errësirë që nga e enjtja në mbrëmje, pjesën dërmuese të Venezuelës.

“Problemi i tanishëm me energjinë elektrike është më i madhi në disa vitet e fundit”, theksojnë mediat e Venezuelës.

E përditshmja El Pitazo shkruan se dështimi me furnizim të shtetit me energji elektrike ka të bëjë me dështimin e hidrocentralit Simon Bolivar, i njohur edhe si Diga e Gurit që ndodhet në shtetin jugor të Bolivarit.

Diga e Gurit është një nga stacionet më të mëdha hidroelektrike në botë, dhe si i tillë paraqet furnizimin kryesor të Venezuelës me energji elektrike.

Ministri i Energjisë, Luis Motta Dominguez, ka thënë se “zhvillimet e fundit nuk paraqesin një sulm ndaj qeverisë, por sulm ndaj popullit”.

Terrin energjetik e ka komentuar edhe presidenti i vendit, Nicolas Maduro, i cili në llogarinë e tij në Twitter shkroi se “lufta elektrike të cilën e zhvillon imperializmi amerikan kundër popullit tonë, do të përfundojë e mposhtur”.

Venezuela po përballet me mungesa të theksuara të ushqimit dhe të ilaçeve ndërkohë që sipas Fondit Monetar Ndërkombëtar ka normën më të lartë të inflacionit në botë.

Venezuela u përfshi në protesta që nga 10 janari, kur presidenti Nicolas Maduro dha betimin për mandatin e tij të dytë pas zgjedhjeve që bojkotoi opozita.

Tensionet u përshkallëzuan, kur lideri i opozitës Juan Guaido më 23 janar u vetëshpall president i përkohshëm, të cilin e mbështeti SHBA-ja dhe shumë vende evropiane dhe të Amerikës Latine ndërsa Rusia, Turqia, Kina, Irani, Bolivia dhe Meksika mbështesin Maduron.