Në fund të dhjetorit, Kuvendi i Republikës së Kosovës përmbylli sesionin dimëror me seancën ku do të votohej buxheti për vitin 2019, por që dështoi.

Që Projektligji për buxhetin të kalojë, tani duhen votat e deputetëve të PSD-së, të cilët kishin kushtëzuar votimin me pesë kërkesa drejtuar kryeministrit Ramush Haradinaj, shkruan Indeksonline.

Këto pesë kërkesa të PDS-së kanë të bëjnë me Ligjin për Pagat, Dialogun me Serbinë, Ligjin për Qeverinë, funksionalizimi i plotë i Ministrisë së Bujqësisë, përkatësisht shkarkimin e ministrit Nenad Rikallo dhe të reduktohen skemat sociale në buxhetin e Kosovës.

Derisa kryeministri nuk ka ndërmarrë asnjë hap në këtë drejtim, kryesia e Kuvendit dje mori vendim që seanca e parë plenare për sesionin pranveror të mbahet me 30 janar, kurse më 31 janar paralajmëroi seancën për buxhetin e vitit 2019-të.

Për kërkesën e PSD-së, Haradinaj ditë më parë tha se ajo është legjitime, por që do ta shqyrtojnë me kohë.

“Lirimi nga detyra i ministrit Nenad Rikalo është kërkesë legjitime e një subjekti politik dhe do të shqyrtojmë në kohë. Kur ti vjen reni edhe atij e hjekim, pse jo”, ka thënë shkurt Haradinaj.

Indeksonline ka kontaktuar me Zyrën e kryeministrit për të marrë informacione nëse kërkesa po shqyrtohet.

Në përgjigje thuhet se ‘qëndrimi i kryeministrit Haradinaj sa i përket shkarkimit të ministrit Nenad Rikallo mbetet akoma i njëjti, nuk ka ndryshuar”.

Në anën tjetër, ministri, shkarkimi i të cilit po kërkohet nga PSD-ja, kohëve të fundit është parë më i angazhuar në punët që i takojnë, duke zhvilluar takime të shumta dhe duke nënshkruar marrëveshje që ndërlidhen me Ministrinë e Bujqësisë.

Kujtojmë se në tetor të 2017-tës, deputetët e LDK-së kishin iniciuar një mocion përmes së cilit kërkuan rrëzimin e Ministrit të Bujqësisë, Pylltarisë dhe Zhvillimit Rural, Nenad Rikallo, i cili akuzohej nga disa banorë të lagjes ‘Dardania’ në Prishtinë për abuzim gjatë luftës së fundit.

Mirëpo, për këtë mocion 27 deputetë kishin votuar pro, 40 kundër dhe një kishte abstenuar.