Sekretar i Përgjithshëm i NISMA Socialdemokrate, Bilall Sherifi, njërit edhe Shef i Grupit Parlamentar të kësaj partie, i kërkon BE-së të qëndrojë neutrale për taksën.

“Vendosja e taksave për produktet e Serbisë dhe të Bosnjës e Hercegovinës shërbeu për të përdorur një mori formash të presionit ndaj Kosovës, duke na i kujtuar parimet themelore dhe vlerat mbi të cilat mbështetet BE-ja”, shprehet Sherifi, shkruan arbresh.info.

Sipas tij, të gjitha ankesat që janë bërë nga ana e Kosovës për mosrespektimin e marrëveshjeve të nënshkruara në Bruksel kanë gjetur një trajtim mospërfillës nga ana e Serbisë.

“Problemet të zgjidhen në kuadër të dialogut Kosovë-Serbi”, thotë Sherifi është përgjigja për pothuajse të gjitha ato që i bënte Serbia duke shkelur shumicën e marrëveshjeve të arritura në Bruksel.

Ai shton se taksa e vendosur për produktet e Serbisë dhe Bosnjës e Hercegovinës është çështje që mund të zgjidhet vetëm në kuadër të pakos së përgjithshme të dialogut Kosovë-Serbi.

“Në kohën kur Kosova i plotësoi të gjitha kushtet për heqjen e regjimit të vizave ndaj qytetarëve të Kosovës, getoizimi i qytetarëve të Kosovës nuk është në frymë të bashkëpunimit rajonal dhe as në përputhje me parimin për qarkullimin e lirë të njerëzve, ideve dhe mallrave që qëndron në themelet e vlerave demokratike,” shprehet Sherifi.

Ai shton se do të kishte qenë mirë që Komisionari Johanes Hahn dhe të gjithë përfaqësuesit tjerë të BE-së që kanë ndjekur angazhimet e Kosovës në këtë proces, të angazhohen për të dëshmuar se edhe në rastin e Kosovës BE-ja funksionon në përputhje me parimet e veta.

“Deri tani realiteti dëshmon logjikën e dyfishtë dhe matjen me dy kute,” përfundon Sherifi./arbresh.info/