Milan Radojcic i cili po kërkohet nga Policia e Kosovës nën dyshimin se është i përfshirë në rastin e liderit serb Oliver Ivanoviqit, ka krijuar lidhje të forta me Policinë në veri.

Radojcic është i afërt i Zvonko Veselinovic i njohur si ‘Baba i Urës së Ibrit’. Këto burime i kanë thënë portalit arbresh.info se Zvonko pasi u angazhua në Beograd me punë, pushtetin e tij në Veri ia la Milan Radojcic i cili po cilësohet nga serbët edhe si ‘Zot i veriut’.

Sipas burimeve të portalit arbresh.info, Radojciç ka financuar strukturat kriminale në Veri, madje ai ushtron kontroll mbi Listën Serbe.

E lidhjet e tij me Policinë në Veri, Radojcic i ka përmes  Shefit të  Stacionit Policor në veri, Zeljko Bojic, të cilin e ka mik të ngushtë. Madje këto burime thonë se pushteti i tij shtrihet edhe mbi policinë në veri. Ata janë parë bashkë në disa raste.

Sipas informatave nga këto burime dhënë portalit arbresh.info, Milan Radojcic dhe grupi i tij dyshohen për djegien e shumë veturave në veri madje edhe djegien e veturës së Ivanoviqit.

Këto burime kanë thënë se Radojcic kishte sulmuar edhe ish-koordinatorin serb për dialog, Borko Stefanovic ku rasti kishte ndodhur në një kafene në veri ku kishte qenë e pranishme edhe Edita Tahiri. Në këtë rast nuk kishte ndërhyrë fare Policia e Kosovës, gjë kjo e cila po dëshmonte ndikimin e tij mbi Policinë.

Ndryshe Milan Radojcic është pronar i një autolarje në fshatin Rudar të Mitrovicës së Veriut. Mësohet se vlera e kësaj autolarje kap shifrën nga 100 deri në 150 mijë euro dhe është autolarja më e përsosura me teknologjinë më të re.

Po ashtu Radojcic posedon edhe një veturë në vlerë prej 60 mijë euro.

Ndryshe para disa ditës Policia e Kosovës ka arrestuar katër persona në Veri të Mitrovicës, tre prej tyre të dyshuar për lidhje me vrasjen e liderit serb, Oliver Ivanoviq, dhe mësohet se ky aksion u zhvillua edhe për arrestimin e Milan Radojcic.

Ndërsa sipas raportimeve të medieve serbe, Radojcic është intervistuar dje nga Prokuroria e Serbe lidhur me rastine Oliver Ivanoviqit

Portali arbresh.info ka dërguar pyetje në Policinë e Kosovës për të kuptuar se a do të ndërmarrin ndonjë masë ndaj Shefit të stacionit të Policisë në Veri, Zeljko Bojic i cili duket se është mik i ngusht i Radojcicit , ky i fundit i dyshuar për disa vepra, dhe është në pritje të përgjigjeve. /arbresh.info