E shtuna në Superligën e Kosovës mund të shohë lëvizje të rëndësishme në tabelë për shkak të natyrës së sfidave që do të zhvillohen.

Ballkani i Suharekës e pret në shtëpi liderin e Superligës, Feronikelin.

Vendasit e Suharekës pritet të mbushin stadiumin për këtë sfidë duke parë momentin e mirë të skuadrës që triumfoi në udhëtim te pretendenti tjetër, Llapi, e që është shenjë se “gomistët” mund të mposhtin cilën do skuadër.

Feronikeli në anën tjetër arriti të mposhtë Drenicën në shtëpi përkundër faktit se rezultati ishte i barabartë në pjesën e dytë, kurse mbetet të shihet nëse Drenica do të arrijë të fitojë dhe të mbajë të paprekur pozitën e parë.

Kjo do të varet shumë edhe nga Prishtina, përcjellësja më serioze e Feronikelit, që udhëton te Drenica, në një udhëtim tradicionalisht të vështirë për kryeqytetasit.

Drenica tregoi ndaj Feronikelit se nëse dëshiron mund të ndalë skuadrat lidere. Në pjesën e parë të kampionatit Drenica u mposht në Prishtinë minimalisht pas një performance të mirë dhe do të mundohet ta replikojë performancën, por jo edhe rezultatin.

Prishtina është në formë të lartë pasi e fitoi me dominim të lartë ndeshjen ndaj Trepçës 89′ dhe lajm i mirë është kthimi në formë i sulmuesve si Marjo Morina e Khalid. Pikërisht Morina realizoi golin e tij të tretë në katër ndeshje ndaj Trepçës, kurse dallohet edhe performanca e fortë e mesfushorëve që pritet të jenë kyç edhe ndaj Drenicës.

Një ndeshje tjetër interesante është ajo e KEK-ut në shtëpi ndaj Flamurtarit, ku Kuq e Zinjtë dëshpërimisht duan fitoren pasi nuk arritën të ndalin Dritën.

Të gjitha ndeshjet zhvillohen nga ora 13:30.