Hapësira e Akademisë së Shkencave dhe Arteve të Kosovës ka qenë sot e rezervuar për shumë qytetarë dhe personalitete që kanë shkuar për t’i bërë homazhe trupit të ndjerë të akademikut Mark Krasniqi.

Ishte kryetari i kësaj akademie Hivzi Islami që sot kujtoi veprimtarinë e Krasniqit prej akademiku. Ndërsa për homazhe erdhën edhe presidentja e vendit Atifete Jahjaga, i pari i ekzekutivit Isa Mustafa, ministri Arsim Bajrami, akademik Nexhat Daci, ish-presidenti Fatmir Sejdiu, rektori Ramadan Zejnullahu, veprimtari Harry Bajraktari e shumë personalitete tjera të njohura.

Ata bënë nderime pranë arkivolit me trupin e pajetë të akademikut, arkivol ky që ishte i mbështjellë me flamurin Kuq e Zi.

Për kryetarin e ASHAK, Hivzi Islami, Krasniqi ishte njëri nga personalitetet më të shquara në fushën e shkencës dhe të kulturës shqiptare të gjysmës së dytë të shekullit XX dhe fillimit të këtij shekulli.

Për Kosovën, tha Islami, është shuar një dijetar, intelektual dhe veprimtar i spikatur i çështjes kombëtare, që la gjurmë të thella në jetën e gjithmbarshme të Kosovës dhe të botës shqiptare.

Në fjalimin e tij të gjatë për akademkiun e ndjerë, pas nderimit me një minutë heshtje, Islami, mes tjerash, kujtoi edhe karrierën e të Mark Krasniqit.
Pas fjalimeve, u bënë homazhe pranë trupit të ndjerë të Akademik Mark Krasniqit, i cili ndërroi jetë ditën e premte. Përveç presidentes Jahjaga, kryeministrit Mustafa, ish presidentit Sejdiu, homazhe bënë edhe shumë personalitete tjera.

Kortezhi me trupin e pajetë të akademik Mark Krasniqit pastaj u largua nga Akademia e Arteve dhe Shkencave të Kosovës. Ai përshkroi rrugën Agim Ramadani, për të bërë homazhe dhe nderim para shtatores së Presidentit Ibrahim Rugova, për të vazhduar homazhe e nderime para shtatores së Skënderbeut, dhe para shtatores se Nënës Terezë. Ceremonia e nderimit u mbajt në sallën e sportit të Pallatit të Rinisë, ndërsa varrimi në varrezat katolike në lagjen Arbëria në ora 17.00.