Fillimi i vjeshtës shoqërohet gjithmonë me një problem shumë të bezdisshëm për shumë vajza, rënia e flokëve. Megjithatë gjëra nuk mbarojmë me kaq, krahas këputjes dhe dobësimit të flokut, një problem tjetër shqetësues është zbokthi. Po përse dhe si formohet ai? Zbokthi shkaktohet nga një parazit tepër i zakonshëm, një kërpudhë lëkure e quajtur Pityrisporum ovale. Kur kjo kërpudhë ndodhet në sasi të mëdha ose kur njeriu është tepër i ndjeshëm ndaj saj, lëkura kundërvepron duke krijuar zbokth në tabanin e flokëve. Nëse jeni lodhur nga shampot antizbokth, provoni dy metodat e mëposhtme:

1.Locion me borzilok: Borziloku ka në përmbajtjen e tij shumë antioksidantë, si dhe përbërës me veti antiinflamatore dhe antibakteriale; vitaminë K dhe hekur. Prej shumë vitesh, ai është kthyer në një prej përbërësve të preferuar në industrinë e kozmetikës. Në qoftë se keni probleme të vazhdueshme me zbokthin, Living ju rekomandon që të zieni 200 gr borzilok me 2 litra ujë. Më pas filtrojeni dhe njomni gjithë flokët. Lëreni të veprojë për 1 orë dhe më pas lani kokën si zakonisht.

2.Locion me majdanoz: Majdanozi është një ndër erëzat më të shëndetshme që mund të ekzistojë, sidomos për problemet e traktit urinar, tretjes dhe forcon sistemin imunitar. Por jo më pak i rëndësishëm është veprimi i kësaj erëze, në trajtimin e zbokthit. Majdanozi përmban vitamina A,B,C dhe D, kalcium, hekur dhe kalium. Veproni si më sipër, do me thënë zieni 200 gr majdanoz në 2 litra ujë dhe filtrojeni. Më pas me lëngun e përftuar lagni flokët në gjithë gjatësinë e tyre, masazhojini dhe lëreni të veprojë për disa orë.