Nënkryetari i Lidhjes Demokratike të Kosovës, Lutfi Haziri, që kohëve të fundit ka qenë shumë aktiv në debatin për procesin e dialogut Kosovë-Serbi në një intervistë për KALLXO.com ka folur edhe për idenë e bashkimit të Luginës së Preshevës me Kosovë.

Sipas tij, kjo kauzë nuk është e Hashim Thaçit, por se fillimisht ka qenë e tij. Ai kujton se më 2013 është miratuar në Kuvendin e Kosovës rezoluta për zgjidhjen e problemit të shqiptarëve.

“Presidenti Hashim Thaçi i është bashkëngjit opsionit tim për zgjidhjen e problemit të shqiptarëve në Lindje të Kosovës. Më 2011 unë kam dalë publikisht me propozim ndërsa më 2013 i kam propozu Kuvendit rezolutë e cila është miratu me konsensus nga të gjithë partitë politikë shqiptare. Prej atëherë unë asnjëherë s’jam ndalë në kauzën për bashkimin e Luginës së Preshevës, në përputhje me referendumin e shprehur, me u zbatu edhe në nivel të brendshëm e të ndërkombëtar”, tha Haziri për KALLXO.com

Sipas tij, Hashim Thaçi asnjëherë nuk e ka zbatuar rezolutën e nxjerrë nga Kuvendi i Kosovës në vitin 2013.

“Unë kam kërku që kjo rezolutë me u zbatu. Asnjëherë, fatkeqësisht edhe si kryeministër z. Thaçi nuk e ka zbatu, nuk e ka marrë për bazë këtë rezolutë, sepse i kish ndihmu shumë”, tha Haziri në intervistën e dhënë për KALLXO.com.

Megjithatë, Haziri nuk i konsideron si vjedhje të kauzës deklaratat e Thaçit, por thotë se e mirëpret ardhjen e tij si president në këtë ide.

Madje sipas tij, Kosova nuk ka nevojë as për rezolutën propozuar nga opozita e as nga përfaqësuesit politikë të Luginës së Preshevës, por thotë se është dashtë që rezoluta e vitit 2013 të zbatohet.