Albin Kurti, lideri i Vetëvendosjes, ka kujtuar Kushtetutën e Kaçanikut, në 28-vjetorin e saj, duke treguar si e ka trajtuar ajo çështjen e kufijve të Kosovës, që së fundmi ka nxitur debat pas deklaratave të presidentit Hashim Thaçi se me Serbinë do të negociojë korrigjimin e kufijve.
Kurti ka thënë se shumë specialistë të së drejtës kushtetuese vlerësojnë se ajo kushtetutë ishte më e përparuar se Kushtetuta aktuale e Kosovës.
“Para 28 vitesh, më 7 shtator 1990, u shpall Kushtetuta e Kaçanikut. Ishte kjo Kushtetuta e Republikës së Parë të Kosovës, e Republikës së 2 Korrikut, e republikës-për-rezistencë. Shumë specialistë të së drejtës kushtetuese edhe sot thonë se ajo kushtetutë ishte më e përparuar se kjo që kemi, në shumë aspekte, duke garantuar të drejtat kombëtare, ato të pakicave e ato individuale, të drejtat pronësore dhe mirëqenien shoqërore.
Ja përshembull se si e trajtonte çështjen e kufijve të Kosovës Kushtetuta e Kaçanikut në Nenin 8:
‘Territori i Republikës së Kosovës është unik, i patjetërsueshëm dhe i pandashëm. Kufijtë e Republikës mund të ndryshohen vetëm në bazë të vendimit të Kuvendit të Republikës së Kosovës dhe në pajtim me vullnetin e shprehur të popullit me të cilin ka të bëjë ndryshimi.’”, ka shkruar ai në Facebook.
Kurti ka thënë se në atë kohë, shqiptarët nuk e pranonin ndarjen e Kosovës dhe kërkonin që Kuvendi e populli të merrte vendime. Ka shtuar se sot, ekziston një klikë pushtetarësh që s’pyet askënd. Kurti po ashtu ka thënë se populli ka kërkuar republikë e jo diktaturë.
“Asokohe, në kushte pushtimi e okupimi, shqiptarët nuk e ulën kokën dhe nuk e pranuan ndarjen e Kosovës. Ata kërkonin që vetëm Kuvendi dhe populli i Kosovës të merrte vendime sovrane. Ndërsa sot, në kushte lirie e pavarësie, e kemi një klikë pushtetarësh, me në krye Thaçin, Veselin e Haradinajn, që nuk e pyesin as popullin e as Kuvendin. Ata nuk e shpërfillin popullin vetëm kur e shfrytëzojnë, ndërsa Kuvendin nuk e bojkotojnë vetëm kur e manipulojnë”, ka shkruar më tej ai. “Sot, në përvjetorin e Kushtetutës së Kaçanikut, teksa përkujtojmë me respekt ata që e shkruan atë nën drejtimin e Prof. Dr. Gazmend Zajmit, le të kujtojmë po ashtu se populli ynë lirinë e ka kërkuar si republikë, e jo si monarki, ku vendimet i merr një diktator a tiran”.
Dubois ‘i fik dritat’ Joshuas dhe mbron titullin...
Sekretet e mbijetesës në orbitë
”Google” shton rregullat, kontrolle kundër falsifikimeve dhe...
Kur barnat kundër dhimbjeve fillojnë të ndikojnë?
Consumer Reports zbulon dhjetë veturat më të mira dhe më të ...
10 këshilla që fëmija juaj të krijojë zakone të shëndetshme ...