Ndërsa zyrtarët në qytetin amerikan Uashington dhe në shtetin fqinjë, Vixhinia, marrin masa për përvjetorin e parë të një mitingu të nacionalistëve të bardhë, që përfundoi në dhunë vdekjeprurëse.

Presidenti Donald Trump bëri thirrje për unitet:

“Duhet të qëndrojmë së bashku si komb. Unë dënoj çdo lloj racizmi dhe veprime me dhunë. Paqe për të gjithë amerikanët!”, – shkroi në Twitter Presidenti, ndërsa ndodhet në klubin e tij të golfit në shtetin e Nju Xhërsit.
Zoti Trump shtoi se ai “ka luftuar” për përmirësimin e jetës për të gjitha pakicat dhe u zotua se “Nuk do të pushoj kurrë së luftuari për të gjithë amerikanët!”.
Përgjigja e presidentit ndaj mitingut të vitit të kaluar në Sharlotsville të Virxhinias, shkaktoi kritika të mëdha kur ai deklaroi nga dhoma e konferencave për shtyp të Kullës Trump, se “të dyja palët në miting ishin njerëz normalë.”

Të shtunën në mbrëmje, në qytetin e Charlotsvillit u zhvilluan në mënyrë paqësore marshime dhe aktivitete të tjera të komunitetit, në praninë e një numri të madh trupash policore.

“Vitin e kaluar policia nuk u tregua e aftë, ose nuk mori vendimet e duhura për të zbatuar ligjin. Këtë vit është shumë ndryshe. Policia e shtetit të Virxhinias është e pranishme në mënyrë masive dhe ata e kanë nën kontroll situatën,”– thotë një banor i Sharlotsvillit.

Në kampusin e Universitetit të Virxhinias të shtunën në mbrëmje pati një tensionim të gjendjes për shkak të thirrjeve të një grupi demonstruesish dhe një konfrontim mes tyre dhe policisë, por pas vetëm disa minutash, situata u qetësua.

“Kam 10 vjet që jetoj në Charlottesville. Jam student i mjekësisë. U shqetësova për shkak të masave të pakta të adminsitratës vitin e kaluar. Duke dashur të përfaqësoj shkollën dhe shokët mi të klasës, them se ne jemi kundër supremacisë të bardhë dhe kundër asaj që ndodhi vitin e kaluar.”– thotë një student i Universitetit të Virxhinias.

Mbrëmja e së shtunës shënoi përvjetorin e parë të marshimit me pishtarë në duar të supremacistëve të bardhë, në kampusin e Universitetit të Virxhinias. Të nesërmen pati një miting me pjesëmarrjen e shumë njerëzve në qendrën e qytetit të Sharlotsvillit.

Më 12 gusht 2017, qindra nacionalistë të bardhë, në mesin e tyre neonazistë, elementë esktremistë dhe anëtarë të organizatës Ku Klux Klan, u mblodhën në Sharlotsvill, mes të tjerash për të protestuar kundër vendimit të zyrtarëve të qytetit për heqjen e monumentit të gjeneralit të Konfederatës Robert E. Lee nga një park.