Nën patronatin e presidentit të Kosovës, Hashim Thaçi u mbajt akademi përkujtimore në 20 vjetorin e rënies së dëshmorëve Bekim Berisha, Bedri Shala, Elton Zherka, Përmet Vula dhe Bashkim Leku.

Bashkëluftëtari i dëshmorëve, Hajdin Abazi, duke folur për zhvillimet e luftës së UÇK-së, 20 vjet më parë në Dukagjin, ka thënë se më 10 gusht 1998 ishte goditja më e rëndë që iu dha UÇK-së në Junik, mirëpo sipas tij, kontributi I heronjve është i pashlyer për çlirimin e vendit.

“Duhet pranuar, UÇK në Junik nuk kishte armatim adekuat për t’u përballur me ushtri të rregullt sidomos kishte mungesë të theksuar në municion. Por, për fat atyre ditëve kishin ardhur disa njësite të UÇK-së në krye me Bekim Berishën dhe Bedri Shalën që ishin kthyer nga Shqipëria të furnizuar për të shkuar në Drenicë. Bashkë me ta ishte edhe Bashkim Leku. Kjo i dha mundësi qëndresës në Junik si për nga aspekti njerëzor ashtu për nga municioneve”, ka thënë Abazi.

Kryetari i Drenasit, Ramiz Lladrovci, e ka vlerësuar lart kontributin e 5 dëshmorëve, në veçanti të Bekim Berishës, për të cilin tha se është njeriu i dytë pas komandantit legjendar Adem Jasharit për strategji dhe aftësi të jashtëzakonshme luftarake gjatë luftës.

“Pas Adem Jasharit mendoj që Bekim Berisha do të radhitet njeriu i dytë, i cili ka qenë strateg i jashtëzakonshëm i luftës, dhe ka qenë jo vetëm luftëtar, por ka qenë një mësues i mirë i të rinjve. Unë e kam edhe vëllain dhe kunatën heronj të Kosovës, por unë po them se pas komandantit legjendar radhitet Bekimi”, theksoi Lladrovci.

Kryetari i Junikut, Agron Kuçi duke i quajtur kolosë dëshmorët Bekim Berisha, Bedri Shala, Elton Zherka, Përmet Vula dhe Bashkim Leku, ka thënë se nuk ka lëvizje ushtarake për çlirim që nuk është rritur në Junik dhe për të cilat krahasoj ngjarje historike si Kuvendi i Junikut dhe Beteja e Junikut.

Kuçi i vlerësoi dëshmorët si pasuri e UÇK-së, të cilët sipas tij, ranë heroikisht për të mos vdekur kurrë

“Këtë traditë dhe këtë fat e pati Juniku gjatë luftës së Ushtrisë Çlirimtare të Kosovës, të cilët i pat Bedri Shalën, Bekeim Berishën, Elton Zherka, të cilët me plot bindje e theksoj se edhe lufta e UÇK-së nuk do të ishte aq pasur, nuk do të ishte aq e madhe pa këta kolos të cilët ranë për të mos vdekur asnjë herë”, ka thënë Kuçi.

Ndërsa, Ramadan Hoti, nënkryetar i Gjakovës, tha së këta luftëtarë të shquar me vrasjen e tyre vërtet Kosova humbi shumë, të cilët asnjëherë nuk u tërhoqën nga fronti deri në momentin e rënies për liri dhe pavarësi.

“Secili nga këta pesë dëshmorë, kanë qenë një kohë, në një ditë dhe një vend ku u shndërruan në yje të përjetësisë. Kishin biografitë e tyre familjare dhe individuale për kontributet kombëtare të dhëna në vazhdimësi, prandaj, dhe koha e duhur e kushtrimit dhe mobilizimit që me armë t’i kundërvihen armikut, i gjeti ata m’u në vija të para të frontit”, ka thënë Hoti.

Në emër të familjarëve të dëshmorëve, Xheladin Shala, ka thënë se kjo ditë për këta dëshmorë, është moment dhimbjeje, por edhe krenarie. /Telegrafi/