Shtëpia e Bardhë tha të mërkurën se presidenti Donald Trump dhe udhëheqësi rus Vladimir Putin nuk do ta mbajnë takimin e tyre të dytë para vitit të ardhshëm.

Këshilltari i Sigurisë Kombëtare John Bolton tha se Presidenti Trump dëshiron të presë derisa të përfundojë hetimi i prokurorit të posaçëm Robert Mueller për ndërhyrjen e Rusisë në zgjedhjet presidenciale të vitit 2016 në Shtetet e Bashkuara.

Deklarata vjen pas njoftimit të SHBA se nuk ka ndërmend të njohë aneksimin e gadishullit ukrainas të Krimesë nga Rusia në vitin 2014 dhe nuk do të heqë sanksionet ekonomike kundër Moskës derisa Krimeja të jetë kthyer nën kontrollin e Ukrainës.

Sekretari i Shtetit, Mike Pompeo, tha se me pushtimin e Krimesë rusishtfolëse, Moska “u përpoq të minojë një parim ndërkombëtar bazë të mbështetur nga shtetet demokratike, sipas të cilit asnjë vend nuk mund të ndryshojë kufijtë e një tjetri me forcë”.

Diplomati më i lartë i Shteteve të Bashkuara shtoi: “Ndërsa shtetet demokratike përpiqen të ndërtojnë një botë të lirë, të drejtë dhe të begatë, ne duhet ta mbështesim angazhimin tonë ndaj parimit ndërkombëtar të barazisë sovrane dhe të respektojmë integritetin territorial të shteteve të tjera. Rusia, me veprimet e saj, veproi në një mënyrë të padenjë për një vend të madh dhe zgjodhi të izolojë veten nga bashkësia ndërkombëtare”.

Deklarata e zotit Pompeo u bë pak para se ai të paraqitej para Komisionit të Senatit për Marrëdhëniet me Jashtë për t’iu përgjigjur pyetjeve të ligjvënësve mbi një sërë çështjesh globale.