Demokracia Plus sot ka mbajtur një tryezë diskutimi lidhur me punën e Organit Shqyrtues të Prokurimit (OShP) dhe procesin e monitorimit të aktiviteteve të prokurimit aga ana e Komisionit Rregullativ të Prokurimit Publik (KRPP).

Gjatë kësaj tryeze, lidhur me këto dy institucione janë publikuar dy raporte të ndara, të cilat paraqesin problemet kryesore që ndikojnë në gjithë sistemin e prokurimit publik. Menaxheri i Programit në D+, Isuf Zejna, përmendi parregullsitë në OShP, si institucion kompetent për të vendosur për ankesat e ushtruara nga kompanitë ankuese. Ai si problem kryesor përmendi çështjet siç janë mos konsistenca e vendimeve dhe vonesat në vendimmarrje. Ndërsa, Rrita Ismajli, hulumtuese në D+, tha se ka mungesë të mbikëqyrjes së aktiviteteve të prokurimit nga ana e KRPP-së, veçanërisht në fazën pas dhënies së kontratës.

Ajo theksoi se do të ishte më së i nevojshëm adaptimi i monitorimit të plotë të kontrollit ex-ante dhe ex-post në këto aktivitete. Kryetari i OShP-së, Blerim Dina mos konsistencën e vendimeve e arsyetoi me rrethana të ndryshme që dalin nga rasti në rast, e që sipas tij nuk duhet të krijohen shabllone në vendimet që merr paneli shqyrtues. Ndërsa për vonesat në vendimmarrje fajësoi autoritetet kontraktuese, pasi nuk dorëzojnë dosjet me kohë. Anëtari i Bordit të KRPP-së, Sami Uka, tha se monitorimi që bën KRPP, pavarësisht numrit të vogël të zyrtarëve, ka pasur efekt në evitimin e mangësive në prokurim publik, por jo edhe në luftën kundër korrupsionit. Ai ndër tjera shtoi se është e pamundur që të monitorohen rreth gjashtë mijë njoftime që bëhen në vit me numrin aktual të zyrtarëve.