Rruga përfundon në kanal, banorët e Gosës në protestë

14:20 | 3 Korrik 2018
Arbresh.info

Për herë të dytë brenda një muaji, banorët e fshatit Gosë të Bashkisë Rrogozhinë dolën në protestë për infrastrukturën e dëmtuar.

Rruga dytësore e ndërtuar pa asnjë standard, vetëm 1.5 km e gjatë, ka vetëm hyrje, por jo dalje.

Kushdo që futet në këtë aks dytësor, nga Gosa deri në Bishtin e Zhurit, mbetet i bllokuar sepse rruga të çon drejt një kanali.

Banorët thonë se, me ndërtimin e rrugës dytësore ata janë izoluar tërësisht. Për të shkuar në anën tjetër të rrugës duhet të bëjnë kapërcim pengesash në bordurat anësore dhe trafikndarësen e autostradës Lushnje-Rrogozhinë, ose duhet të përshkojnë në këmbë ose me mjete bujqësore rreth 7 km.

Rruga nuk ka as nënkalime dhe as mbikalime që të mundësojnë lidhjen e banorëve të fshatrave Gosë e Madhe, Gosë e Vogël, Lekaj dhe Kërçukaj, me pjesën tjetër të fshatrave. Veç kësaj, mungesa e rrugës funksionale dytësore ka bërë që shumë biznese të zonës të falimentojnë, pasi nuk i shkon njeri./tch

Shpërndaje në rrjete sociale

Lajmet më të lexuara

Të ngjashme

Foto lajm