Duke folur për procesin e hapjes së negociatave gjatë një takimi me strukturat e integrimit në Ministrinë e Europës dhe Punëve të Jashtme, Kryeministri Rama u shpreh se këto 12 muaj do të jenë decizivë për vendin.

Sipas tij çelja është vendosur në qershor të vitit 2019, por komisioni do të nisë procesin përgatitor që tani.

“Ka një ndryshim midis çeljes së negociatave imediate dhe në 12 muaj, por është shumë formal. Edhe sikur çelja e negociatave të ishte imediate, ne do të na duhej një punë përgatitore që do të merrte një kohë që shkon deri në 12 muaj.

Fakti që çelja e negociatave është e caktuar në 2019, por komisioni do të nisë menjëherë procesin përgatitor. Nuk kemi humbur 12 muaj, por kemi 12 muaj punë që do të bëheshin edhe me hapjen e negociatave”, tha Rama.

Sipas Ramës nuk ka asnjë kusht të vendosur nga Evropa për Shqipërinë.

“Më vjen për të qeshur dhe qarë, kur dëgjoj se Evropa ka vendosur 13 kushte, por nuk është kështu. Por këtu nuk është çështje kushtet, por përputhshmërisë së shtetit me vendet anëtare të BE, dy organizmat të bëhen një.

Të gjithë e dine që dy orë përpara vendimmarrjes nuk kishim tekst për shkak të dinamikës së brendshme të bisedimeve. Reforma në drejtësi te ne është unikale e gjithëpranuar si model që duhet shtrirë më tutje në të gjithë rajonin tonë, me kosto jot ë vogla, për të cilën ne rrezikuam koalicionin qeverisë.

Për rëndësinë që ka Europa në ka në këtë territor, fqinjët tanë ndërruan emrin. Procesi është jashtëzakonisht i sofistikuar dhe me mekanizma djallëzorë që vetëm BE mund t’i krijojë dhe ka nevojë për një punë të jashtëzakonshme për të qenë në orar, për të qenë cilësisht të gatshëm për të adresuar problematikat, për të vazhduar thellimin e një procesi që për ne ka nisur”, tha Rama.